SATAUN TINA MANGTAUN-TAUN

Dina bangku kosong di juru alun-alun

Kekebul jeung girimis silih rangkul

Raca kawas céda

Ah! Naon nu leuwih peurih?

Batan sono nu kaleuleuwihi

2021

AGUSTUS 2021

Merdéka téh atrana sora

Lain ditongtoyong ayat-ayat kulawu

Merdéka téh daék narima sora

Lain balilu ku lagu haliwu

Merdéka téh nyaéta merdéka

Lain balem atawa dibekem

2021

LARAS KAHIJI

Lir kawat-kawat nu dipureut tarik

Nyurupkeun nu nyusup dina rangkulan

Atawa nu nyekleuk na panineungan

Rajeun teu kaberik

Tangéhna antara kuring jeung anjeun

2021

LARAS KADUA

Aya nu nganteng

Diperih nganteur galindeng

Aya nu teu kendat sasambat

Saméméh pegat

2021

SALAMBAR KERETAS NU MURAG TINA CATETAN

Ku cara séjén kuring keur miasih anjeun

Nyelap-nyelapkeun sakur nu kungsi aya

Pikeun ngeusian lolongkrang di nu geus taya di kieuna

Nepi ka urang ngarasa duk-dek antara aya jeung euweuh

Ku cara séjén kuring geus miasih anjeun

Ruruntuk nu kapuluk kakelar nu bacacar

Dina deukeut jeung anggang aksara nu ngan wasa cacarita

Hareupeun nu kawaranan maca

2021

AROM HIDAYAT, lahir di Bandung Barat taun 1981. Dumuk di Cililin, Kab. Bandung Barat. Nulis sajak jeung fiksimini, dimuat dina majalah Cupumanik, Manglé, Kabar Priangan, Galura, majalah Semboyan, jeung Galamédia. Sajakna kungsi dilélér hadiah sastra LBSS. Buku kumpulan sajakna nu geus medal nyaéta Hariweusweus Leuweung Pineus (2013). Kiwari sapopoéna lian ti nulis sajak, ogé nulis rumpaka lagu jeung ngeureuyeuh ngoléksi wayang golék.