 |
| Ilustrasi: "Head of A Baby" kénging Jacques-Louis David (1748-1825) |
Anaking,
Mangtaun-taun dibaju urang kudu apal
Héséna ngabuskeun kantéh kana jarum
Laju ngaput sangkan jadi lawon paranti
Harudum. Sabab bebeneran mangrupa
Papakéan nu salawasna disarungsum
Saupama kasalahan anjeun mirupa
Seuseuhan di kamar mandi
Baham bapa keran nu malidkeun
Kokotor liwat kocoran cai
Saupama kasalahan anjeun mirupa
Popoéan nu kakara dijaitan
Dampal bapa istrikaan nu satia
Ngusapan sangkan baju rapih ditilepan
2020
JAGA
Anaking,
Bapa teu jangji ngajak anjeun mapay galengan
tuluy reureuh handapeun tatangkalan
tapi urang bisa nikreuh di pipir jalan baseuh
bari léngkah dicaangan ku béntang tihangan
Urang bakal susah ngimpleng pagunungan
disimbut halimun katut gupay dangdaunan
tapi urang bisa ningali gedong dibaju lampu
jeung harepan nu ngahiap tina papan iklan
Isuk jaga aya dina ranggeuman anjeun
Naha rék melak tangkal kahirupan
Atawa ngécagkeun tihang listrik
nu ngamalirkeun jutaan watt impian
2020
KEUEUNG
Anaking,
Jaman bapa budak kakeueung téh
Sarupa jidar nu bencar lebah keuneung
Jeung sabuk nu leupas tina beuteung
Laju bekas kana puhu leungeun
Ayeuna kasieun téh ngan sora peura
Lamun ménta hampura ka anjeun
Sarta létah nu susah ngéjah kanyaah
2020
SEUNEU
Anaking,
Jauh ti anjeun
Sono téh jadi seuneu
Ngaléntab lalangit dada
Ngaduruk lulurung jantung
Tapi dina hiji mangsa
Ieu sono bakal cunduk
Dina lampu patromak
Lila-lila saateun minyak
Atawa kana damar
Nu dirungkup kaca
Laun-laun béakeun hawa
Nyaangan nepi rerep nyawa
2021
ANGIN
Anaking,
Teu salawasna angin nurunkeun
Pepedut ti gunung ka pilemburan
Sakapeung saukur nurunkeun
Hitut ti beuteung ka pamiceunan
Teu salawasna angin ngahiap
Rénghap kahirupan
Sakapeung saukur nungtun
Ranjug panganggeusan
2021
MUHAMAD FAISAL, lahir di Bogor, 21 Séptémber 1994. Alumni Departemén Pendidikan Bahasa Daérah, UPI Bandung. Salila kuliah kungsi aktif di komunitas sastra Turus Hima Pensatrada UPI. Karya-karyana dimuat dina Manglé, Tribun Jabar, jeung Buruan.co. Ayeuna cepeng gawé di SMAN 1 Cisarua Bogor.
0 Komentar