 |
| Ilustrasi: "Animal Fate" kénging Franz Marc (1913) |
PANGANTÉN
Manéhna ngasah balati
di satukangeun kaméja.
Kaangseu seungit malati,
getih lamokot dina mata.
Tengahing hangit mayit
di sapanjang jalan,
kaambung seungit samoja
nyambuang dina granat pikiran.
Lawon bodas ngalangkang.
Boéh rébuan bugang.
PANDEMI
Urang lir saabringan domba
nu diincer sakadang singa.
2020
BALON
: Syria
Dua balon dina ranggeuman
jadi hiji-hijina harepan,
sanajan témbok geus burakrakan.
Di antara ruruntuk sakola,
manéhna ngoréhan barjanji
jeung kitab imrithi.
Di dieu, taya deui nu nyésa.
Kaadilan sakadar mortir
nu ngincer dada kami.
Batu, kawat waja,
jeung gas kimia,
lir leungeun iblis ti naraka.
“Béjakeun, Bashar! Upama
dua balon ngahiur ka jauhna,
ulah tumanya iraha kami palastra!”
2021
H I R O
Di lawang guha,
hiji lalaki ngalangeu
tengahing hirup nu kliseu.
Tapi di juru guha,
hiji lancah geus lawas
nganti-nganti éta lalaki.
Barang kapireng sapotong kalimah,
sakadang lancah sadrah
tur sujud salawasna.
2021
0 Komentar