Ilustrasi: Gaberndorf II, kénging Lyonel Feininger (1924) |
MÉNGGOK
lalangsé ngahelob mangsa ménggok
nyingkabkeun lalakon di pakarangan
lebah ledok-ledok leutak
na dagleg-dagleg kekebul
narémbongan
lalangsé ngahelob mangsa ménggok
gerentes haté hideng waléh
jampé paéh
diéjah kénéh
Sukasari, 6 April 2021
NGEUNTEUNG
kalangkang tangtung kalangkang beungeut dina eunteung
najan maya kapan atra
helar taker umur nu tompér; muru rarambu waktu
nu peungkeur nungtutan mungkur
ngagandoy kabetot bangkarak almenak
kulit kisut ngaranjing ingkig nu tangéh ka kesit
silalatu patengah ngagingsir kelir mimiti
helang talatah
nu hideung geus manjing malih putih
2021
GARUNG
inggis nitih wancina
kebon-kebon jadi beton
henteu ngambeu huntu pacul
anu marintul kalampud tai hiang
doran ngelik jadi papaés bilik
léléwa layar
ngalindih singkil jadi sumingkih
palangsiang datang mangsana
babaladon léndo teu ngasaan deui tapak singkal
turiang nu renung nungtutan pérang
lebah lemah nu kalah bejad ngewag
sab
pangaji ngabedug teu metu mandé buburuh di dayeuh
2021
UJUNGBERUNG
waktu geus tinemu asma anjeun
ngotrét dina éntép galur dongéng
bobojong wétan Talaga Bandung
tungtung talaga sapeuting
tungtung laku nu ngaberung
anu migandrung ka indung
usum ngotrétkeun deui asma anjeun na sésa cihujan
sésa nu ngaberung di lamping Manglayang
cileuncang leungiteun akar geusan ngeumbing geusan muntang
ti Elos terus ngalolos
ka Palalangon nu rajeg ku saung beton; panglangeuan juragan
sakiceup ngalalar ka Cilalareun
kebat mudun ka Cigending nu ginding ku gedong
taya dangka di Cinangka da sidik rupek gegek ku toko
Ujungberung
Talaga Bandung
talaga cileuncang
dua catetan
Ujungberung, usum ngijih 2020
SRI SUSSI ARIÉS LULUPI, gumelar di Sumedang, 6 April 1972. Dumuk di Kabupatén Sumedang. Alumnus Jurusan Pendidikan Bahasa Daérah, Fakultas Pendidikan Bahasa dan Seni, IKIP Bandung (kiwari UPI), lulus taun 1998. Cekel gawé jadi guru basa Sunda di SMPN 1 Tanjungsari, Kabupatén Sumedang. Pangaresepna kana maca, seni, jeung diajar tulas-tulis. Bukuna anu geus medal nyaéta kumpulan sajak Sekar Gawir (Rawayan, taun 2020). Aktif jadi anggota Musyawarah Guru Mata Pelajaran (MGMP) Bahasa Sunda SMP Kabupatén Sumedang.
1 Komentar
Wilujeng bu Susi... Mantul pisannn... 😍😘🥰
BalasHapus