 |
| Ilustrasi: The Entrance to the Public Garden in Arles kenging Vincent van Gogh (1888) |
KUNGSI ANTENG LEBAH DINYA
beureum kembang pacar
malati ligar pandeuri
di landeuheun pakarangan
jalan satapak kalakayan
kungsi anteng lebah dinya
nyawang ronghéap sorangan
terus kuring duaan
pataréma leungeun
puisi nu keur marengan
datang tina rasa leungiteun
2015
CISARUA
halimun cikénéh peuray
nyésakeun ibun
pikeun nu getén lugay
miara cahaya
dina célak tungtung daun
amparan sora nu lumampah
tina jentréng pantun buhun
2016
GIRIMIS NGEREPAN DEUI
lebah dinya girimis ngerepan deui
tina langit nu kamari kaanjangan ku impian
lebah dinya aya gedat katumbiri
tétécéan sakur jiwa nu kasmaran
wanci nu kasampeur dina angka kilométer
teu weléh jadi kakurang
nungguan na tungtung umur
2017
KALANGKANG SASAK BEUSI
kalangkang sasak beusi
dina réok cai nu manjang
tina pikir anu suni
ngajak jengkar ka sakur gerentes batu
nu satuhu ngabaeukeun sakur tatu
kalangkang sasak beusi
jeung hiji waruga nu nyileukeuman riak
merenahkeun deui sakur pitapak
kana kelir cai, riuk nu mindeng ngajak biluk
nangtang sarébu muara
nandeskeun diri ku sora kateudaya
kembang rungkun wates babantar
oyag katebak angin ti kulon
kungsi ayeuh sabot datang caah déngdéng
ligarna kiwari lir béda harti
kalinduhan ku nu ngalangkang
na sasak beusi
2018
SARONGHÉAP
wanci sajentréng kacapi
diringkangan ku haleuang
lumakon na papantunan
ngaprak di sajeroning cicing
lalampahan manggihan kalér nu séjén
kulon wétan raket jeung kiduleun langgeng
di puseuring anggang, kalangkang tepung
jeung dunyana sorangan
ngipuk nu geus puguh pipugureun
luang nu ngan saronghéap
lagu ligar béak ucap
2019
RARATAN
nu sangli di lénglang jalan
sasab na raratan héman
disambat réa kalangkang
ti nu wenang ngajak mulang
2019
BUKU
katungkulkeun nu lain-lain
pareng neruskeun hanca
nu kabaca horéng lain hancenganeun
buku saha jilidna anyar pinanggih?
ules aksarana béda
najan enya betah macana
saban lambar bet karasa pangarahan
mangpuluh leungeun metot
tina saban kaca, ngarangsadan pakéan
nu ngan saraket pikecapeun
geus taya deui métafor
pikeun ngilungan kedalkeuneun
kalimah na badan sakujur
jadi sora na tungtung aweuhan deungeun
2020
TEU SALAMPAR ANGIN
lawang beurang liliwatan
rohang peuting panumpian
nu kapahung pakaulan
nyiar-nyiar panineungan
nu lunta ngadon kapakan
puguh teu salampar angin
haté nu watekna béngbatan
jeung pikiran remen pisan apilain
di unggal tempat pangreureuhan
maluruh nu masih euweuh
bongan ku geus asa kapimilik
dianteur kamalinaan
dihulag henteu payaan
suwung deui liwung deui
dunya rupek ku tangtungan
2020
1 Komentar
Puisi nu keur marengan
BalasHapusdatang tina rasa leungiteun