 |
| Ilustrasi: "Garden" kénging Henry Lyman Sayen |
SIMPÉ TÉH TENGAHING JEMPLING
Sora-sora nu teu kapaliré
Manahoréng nongtoréng na mangsa simpé
Atra lir leyurna sakabéh sora
Nganaha-naha lir karaha sapanjang rél karéta
Demi tapak jeung céda teu béda
Ti hinghing-hariring nu campuh jeroeun dada
Teu béda ti ceurik-seuri nu keri
Sakujur diri
2022
KURUNG
Dina jero kurung
Bacéo sora manuk, “Boa kuring?”
Sarigsig awi nepi ka beusi
Nepi ka tungtung-tungtung karisi
Di luar kurung
Kuring nu lianna kokotéténgan néangan lawang
Bangun sono hayang lawung
Sakadar némbongkeun lebah-lebah nu gudawang
2022
LAMPING HIDEUNG
Paralun ka ciibun
Lamunan bet labas meuntas
Ka ditu ka alam peuntas
Mulung sada dina liuh tangkal tanjung
Panuhun ka cipanon
Ulah rék geruh nabeuh lalakon
Sabab sagalana geus lawas
Kari kawaas
2022
ASA RÉK ENYA
Neuteup nu ngulangkeun pacul
“Asa rék enya!” Ngajul ka alak paul
Ras ka bapa: di lamping bahé ngétan
Nyukcruk gecruk guritan deudeuh
Dina garitan beureum-hideung taneuh
Ngalieukan nu melak siki dina tapak-tapak aseuk
“Asa rék enya!” Bakal melentiskeun bagal jadi tangkal kitawekal
Ras ka indung: di lamping bahé ngétan
Nganti lugay saban pucuk nu tumuwuh
Tina sajeroeun rahuh jeung bangbaluh
Teu neuteup teu ngalieukan
Kebat ninggalkeun maranéhna nu sarua ngajauhan
“Ras ka kebon sorangan!” Di lamping bahé ngétan
Boa keur séséahna bareng jeung rabeng kalangkang kalakay
Kagiridig ku gebligna léngkah jaman
2022
MUN ISUKAN
Angka-angka kalénder teu melang teu nineung
Teger dibeureum dihideung, tapi naha
Teuteup urang bet gumeter ngagambar warnaning haté
Dina pulas ules simpé
Bulu panon, jukut riut jeung girimis
Anteng silih rangkul dina sono pangsunina
Mun isukan urang patepung peurihna kieu
Raheutna kitu tangtu semet nunggu-nunggu waktu
Angka-angka kalénder teu usik teu malik
Angger najan terus diteuteup dibulak-balik, tapi naha
Haté urang bet galideur melang ku hariwang
Mulangkeun sakur injeuman
Pébruari, jukut riut jeung girimis
Lantis nyacapkeun kasono dina lapat-lapatna ringkang katiga
Mun isukan urang paturay teu kudu nyarita
Kumaha éndahna cinta
2022
AROM HIDAYAT, lahir di Bandung Barat taun 1981. Dumuk di Cililin, Kab. Bandung Barat. Nulis sajak jeung fiksimini, dimuat dina majalah Cupumanik, Manglé, Kabar Priangan, Galura, majalah Semboyan, jeung Galamédia. Sajakna kungsi dilélér hadiah sastra LBSS. Buku kumpulan sajakna nu geus medal nyaéta Hariweusweus Leuweung Pineus (2013). Kiwari sapopoéna lian ti nulis sajak, ogé nulis rumpaka lagu, jeung ngeureuyeuh ngoléksi wayang golék.
0 Komentar