%20by%20Paul%20Klee.JPG) |
| Ilustrasi: "Angel Applicant" (1939) kénging Paul Klee. |
PEUPEURA SORA
Aya mangsana laku ngemu haliwu kalbu
Mikukuh pengkuh sakur geruh gumuruh
Nu werat galécok ngan ngenes gerentes
Ngilungan nu tacan karuh diwakcakeun
Taya salahna teger meper gegeder geter
Mun ungkara nu disidem nu dikengkem
Wungkul kedal tugenah jeung pangrinah
Nu sirna tina wiwaha purna tuna waluya
Aya kalana leupas talimbeng gerendeng
Bongan rasa langgeng dipergasa sasama
Geus lawas tatag jeung gentem dibekem
Bekaskeun na bedas najan saengab ucap
Taya bayana galantang rosa nyilantangan
Humaréwos hamo peruh barungsinangan
Najan handaru nu ngari cowong gorowok
Najan aweuhan nu nyésa peupeura sora
2015
KEUNANG KÉSANG
Nu nyésa tina tamper hirup nu tompér
Kari tapak lalakon gedat-gedat kelang
Haropak lacak raca céda lebah tarang
Réro-lamur muni kulit sarapet tulang
Sab ringkel gurat na dampal leungeun
Sab réngkol urat sabuku-buku wujud
Mutuh garit-garit panumbuan waktu
Nepungkeun diri jeung nasib nu keri
Nu nyésa tina angar hurip nu ngahgar
Kari raga nu garing sukma nu garung
Lapat-lapat sora gé nilar pangreungeu
Samar-samar awas gé nilas paneuteup
Nu tuhu nuguran ukur keunang késang
Ngoprot na rapuh harepan ropoh impian
Na batin taréngtong na ati rangkebong
Na garajag na curulung umur mungkur
2015
NAPTU WAKTU
Rumonghéap napas téh ka tungtung taun
Tutas lémpoh norah keteg jeung damina
Tutas limpeu nujum ketug jeung ratugna
Lebah ajur amayak kalakay pananggalan
Lambaran poé nu teu parok kasubadanan
Nungtutan ngararas kana repok wilangan
Babandan nu salilana dileumpeuh mangsa
Darma merenahkeun regas jeung ragasna
Naptu rahayu mutuh itungan rimbu waktu
Naas wuwuh kélangan tina rasa katambias
Nu langen kari kangen jeung angen-angen
Nyirung jeung mugur dina tunggul kalbu
Tungtung taun dapon ngabalénan lalakon
Ruménghap rahuh mindo humégak heruk
Antara régang harepan rangrang impian
Salambar nasib tuluy ngoléang pandeuri
2016
MARANAN JALAN
Lalampahan maranan kebatna jalan
Luméngkah watekna rajeun élodan
Teu kalis sangli opat madhap pilihan
Kalima pancer horéng sasab raratan
Kidul-kalér parekna mijarak anggang
Kulon-wétan raketna wates kalangkang
Ka landeuh ngan wasa ngalajur tineung
Ka girang ngan wenang ngawawaasna
Lalampahan maratan kebatna jalan
Lumaku wuwuh katungkul bulungbung
Sangsri mending mana mending mendi
Longkéwang bihari sumoréang kiwari
Lampar téh geuning sakadar lampar
Ngaprak satemenna sajeroning samar
Ngabaékeun sakabéh nu kalakonan
Ngabaeukeun sakabéh nu pamohalan
2016
SAPANJANG KOJÉNGKANG
Kapan indit nyorangan suda kojéngkang
Balik gé longkéwang séwang-séwangan
Taya nu pareng dengdeng lumanggeng
Gumilir panjang jeung pondok lalakon
Najan papagon papadon darma kamarian
Rénghap panungtungan hégak paméakan
Angkeuhan cacap ngalajur teu isukanan
Bedang sakiwarieun berung teu pagétoan
Saban pikir nu sumingkir ku sangkirna
Saban sangka nu sumengka ku jembarna
Nu luas naratas nu héman ngaledegan
Dina sasab jeung lamparna lalampahan
Nu miang pandeuri nu mulang ti heula
Papasangan karingrang jeung kayakinan
Sapanjang baladah bumetah lumampah
Bakal datang mangsana kudu papisah
2016
PULAS PAMUNGKAS
Galeuhing kaéndahan téh buana saampar
Ramo-ramo gaib luhureun kanvas digelar
Koas-koas cahaya nu disangling matapoé
Gurat kudrat warnaning bumi jeung langit
Sir diarsir haeub ngijih jeung héab katiga
Katumbiri dilukis asih kepris jeung poyan
Atawa layung nu mirun sakur kagandrung
Méméh udat minda rupa lanskap sareupna
Beurang jeung peuting silih kalangkangan
Pataréma liwung ngulawu jeung nambaga
Silih baganti sumanding dina pasini wanci
Silih titipkeun isarah jeung rasiah kasadrah
Jatining kaagungan téh medal jeung surup
Dina tékstur wirahma jeung wirasa wisésa
Keliring takdir antara hideung jeung bodas
Sakabéhna murba jadi pulas nu pamungkas
2016
%20by%20Paul%20Klee.JPG&description=Peupeura Sora - Sajak-sajak Ari Andriansyah){kind=link}
0 Komentar