 |
| Ilustrasi: "Woman" (1930) kénging Tamara de Lempicka |
AWÉWÉ TIWU
jeung dua leungeun
nu nanggeuy leunjeuran kakelar
manéh mapayan tetelar waktu
bari ngahurungkeun durukan peteng
horéng ruruhit jeung rucuk raca ngahurun
dina dadana
dina rungkun peuting
aya nu datang reujeung garajag késang
reujeung babaung ajag nu ngayun-ngambing
rangkulan birahi ranjang. manéh ngageubra
raga ngalungsar kasebrot cahya bulan
bari nilepan kulambu katunaan
manéh ngarérégan sésa lalampahan
antara kabagjaan atawa kasimpé nu ngelun
dina pirunan carita
manéh tuluy ngalintingan beurang
ngagarangan peuting bari terus nebar
karingrang dina tegalan sirah
: hajat panganténan, siraman
jeung helaran nu hibar dina balékambang
dina wanci nu kulawu
manéh ajur digiling longkéwang
2022
CATETAN ANGIN
dina sapanjang usum
boa manéh guligah
nyaksian pasawahan
jadi pependeman beton
pepelakan jadi batu-batu tohaga
laju rék ka mana manéh ngahiukna?
bagantina mangsa
dangdaunan ngarangrangan
tapi manéh teu kungsi ngusapan
atawa anyang-anyangan di buruan
padahal barudak tinglalieuk
reujeung kasabaran
nganti-nganti manéh datang
nepakan langlayangan
kami lawas nungguan
tapi manéh ngarayap ka tanah riwan
laju mulen kembang pajarahan
2022
SAJAK SIMPÉ
perkara naon deui nu rék ditepikeun
tina nguniangna hurup, sabada
hirup ukur metet dina kekecapan
arkaik jeung kelunan métafora
aya kalana manéh mirupa ririwa
ngukuntit ragemna sora atawa
ukur nyatetkeun lalampahan padalisan
nu teuing ka mana brasna
dina saban léngkah pada
horéng nyempil lolongkrang simpé
boa, di dinya manéh huripna
di antaran anggangna jarak
nu can hatam dilisankeun
2022
SARAKAN
sarakan!
satutasna mulang
horéng pabrik-pabrik
tingjuringkang dina sirah salira
pondasina nyeceb dina urat-urat getih
laju mendetan unggal kamalir rénghap
sarakan!
satutasna mulang
horéng walungan-walungan
jadi kokocoran cimata
anu ngamuara jadi ngungun
tuluy salira teuleum
dina kaleuseuh nu beuki lecek
sarakan!
satutasna mulang
horéng patani anteng
nebar kontrakan dina pasawahan
tuluy manén paré
dina tegalan panineungan
2022
ARIF ABDILAH, lahir di Majalengka taun 1989. Internisti, gelandang sayap di cacandran.com. Ku babaturan deukeutna sok digeroan Ayih. Alumni Jurusan Pendidikan Bahasa Daerah, UPI Bandung. Keur kuliah kungsi jadi ketua UKM ASAS jeung Turus. Nulis sajak jeung carpon, dimuat dina majalah Cupumanik, Manglé, jeung Pikiran Rakyat. Bukuna nu geus medal kumpulan sajak Hujan di Pajaratan (2020). Sapopoéna mancén gawé jadi guru basa Sunda di SMAN 1 Bandung.
1 Komentar
Mantaf A 😁👍
BalasHapus