 | |||
| Ilustrasi: Kamel v Ritmicni Pokrajini Dreves (1920) kénging Paul Klee |
MILANGKALA
Jungjunan,
Teuing ngurangan atawa nambahan
Umur unggal mapag poé lahiran
Kawas lilin ngaduruk awakna sorangan
Atawa kuéh anu terus ngabeukahan
Diseupan jaman
Cenah bagja téh saupama lalampahan
Anu jauh kalarung tapi teu lila karasana
Kapan urang masih léléngkah halu
Kakara jadi bapa jeung indung
Tacan jadi aki-nini anu mangku incu
Teuing nambahan atawa ngurangan
Hirup nu surup waktu sareupna
Kawas balon ngagedéan dieusi nyawa
Atawa rénghap-ranjug nu suda
Geusan niupanana
Cenah bagja téh larap dina harta jeung kawasa
Nu nedunan sakur kabutuh jeung kahayang
Kapan urang mah ngan ngandelkeun cecekelan:
Dina unggal kateudaya nyelap kecap aya
Dina unggal kasusah nyelap kecap usaha
2022
RISBANG
Anaking,
Geuning risbang téh babandingan awak sorangan
Boh jati boh lain duanana nampanan impian
Boh kanyeri boh lain duanana nandéan harepan
Basa bapa jeung indung anjeun
ngalocotan paku tina papan nu barobo
Aya nu milu caroplok di satukangeun harigu
Tatu nu mangtaun-taun lawas dipaluan waktu
Ayeuna kamar geus lengkep kasur jeung ranjangna
Sabab legana kasimpé nu namprak baheula
Tutas kaeusian ku motahna kanyaah urang tiluan
2022
KAPAL SELAM
Anaking,
Cenah sajero-jerona laut
Tacan tangtu nandingan jerona hirup
Sabab leuwih babari neuleuman sagara
Tibatan neuleuman haté jelema
Cenah samotah-motahna ombak
Tacan tangtu nandingan panineungan
Sabab leuwih babari nyidem lambak di sagara
Tibatan nyimpen ambek di haté sorangan
Saupama raheut mangrupa lambak
Nu tan watesan. Sakuduna harepan
Mangrupa kapal selam nu teuleum
Tanpa kalebuh di laut kahirupan
2022
BUKU JEUNG TAUN NU KALARUNG
Anaking,
Bapa mukaan deui buku
Hirup nu tacan jauh kalarung
Babasan jeung paribasa nu kabaca
Tacan tangtu larap keur anjeun
Saméméh tulisan nyorang lambaran jaman
Aya catetan anu tacan kungsi kalisankeun
Geuning seuseukeut waktu ngeureut
Raheut urang paheut
Basa ungkara ngaléntab kolot sorangan
Kaca-kaca hampura geus lila kaduruk
Ngelun jadi handeueul nu kaseuseup
Niruk jajantung
Katunggara mangtaun-taun, anaking
Tacan tangtu kauntup ku imut jeung hariring
Aya nu lawas kemba kawas rék kedal ayeuna
Cimata ninggang kalbu laun-laun nutupan tatu
2022
1 Komentar
Keren,,, q
BalasHapus