 |
| Ilustrasi: "The Piano Lesson" kénging Alexandra Ekster (1925). |
RAWAYAN
Anaking,
Nyorang pipikiran sorangan
Ngalabuhkeun manéh ngahiji jadi riak cai
Ngajirim jadi leuwi
Ti jauh anjeun gugupayan kawas hayang jadi rawayan
Antara kakeuheul bapa jeung kahandeueul abah
Nu terus palid ku rongkahna kanyaah
Sabab ti leuleutik abah saukur ngandelkeun
Paneunggeul jeung pangwarah
Papatahan bapa sangkan bisa ngéjah kanyaah
Kawas neueulkeun biwir kana tarang
Atawa nyadiakeun keukeupan paranti mulang
Sakapeung sok aya kaludeung ngagantung beuheung sorangan
Tapi bet ngarandeg sabot nempo dina konci ngagantung harepan
: Anjeun nu satia ngadagoan sangkan bapa mulang
Pabeubeurang urang nyimpang
Ngadon niis ka toko és krim
Sabot bapa nunda sakur pipikiran
Di parkiran
Sabot bapa ngahuleng sakedapan
Geuning nyawa téh kawas boba
Nu terus ngurangan disedotan
Sabot bapa ningali imut anjeun
Geuning hirup téh leuheung keur disorang
Sanajan terus leyur dilamotan waktu
2023
Tacan kungsi meunang dina unggal galungan
Boh jeung harepan boh jeung panineungan
Hirup mah ngadago-dago piéléheun
Mun lalampahan tacan manggih pigeusaneun
Kuring hayang mulang kana lahunan
Ka anjeun nu saenya-enyana keukeupan
0 Komentar